Онытылмас 1418 көн

Хәтердән уела күп нәрсә,
Онытыла иң гүзәл яз, кышлар.
Онытылмый үзенең иңендә
Ил данын күтәргән язмышлар.
Вакытлар үтүгә сүрелеп
Сүнәләр иң якты балкышлар.
Сүнмиләр, яктылык сибәләр
Көрәштә кабынган язмышлар.

Быел Ватан сугышында яуланган Бөек Җиңүгә 66 ел булды. Шушы вакыт аралыгында инде ничә буын алышынырга өлгерде, күпме тарихи вакыйгалар, кешелек, дөнья тормышында күпме истәлекле көннәр үтеп китте. Тик шулай да Җиңү көне, 9 нчы май бәйрәменең көчле рухы әле дә бөтенебезнең күңелләрендә горурлык, шул ук вакытта кайгы хисләре уята. Әйе, үз эченә бәхетле балачак, тыныч тормыш, кеше елмаюларының балкышларын алган Җиңү көненә юл дәһшәтле күренешләрдән, коточкыч авыр сугыш елларыннан, 27 миллион адәм балаларының өзелгән гомерләреннән торды. Ятим балаларга, тол хатыннарга, ялгыз ата-аналарга әниләрен, ирләрен, сабыйларын кем кайтарыр икән?! Кешелек өстеннән шундый вәхшилекләр ясау өчен ни дәрәҗәдә нәфрәтле, кансыз йөрәкле җанвар булырга кирәк?! Әйе, сугыш елларында халык күргән авырлыклар, хәсрәтләр әйтеп, санап бетергесез! Шуңа күрә дә һәрбер буын сугыш еллары, көннәре, вакыйгалары, кайгылары турында онытмаска тиеш. Тарих битләренә күз салып, һәрберебез ветераннарыбызга, гомерләре өзелгән солдатларга карата олы хөрмәт һәм кадерләү хисен сакларга тиеш. Дөнья кешелеккә Аллаһы Тәгалә тарафыннан караңгылык, бәхетсезлек тудырыр өчен бирелмәгән. Киресенчә, тыныч, матур, онытылмас тормыш чәчәкләрен үстерер өчен бөтенебез дә дуслык, мәрхәмәтлелек кояшын яктыртып һәм акыл, гүзәллек туфрагын чәчеп яшәсәк иде. Нәкъ менә шул сыйфатлар кешеләрне хайваннардан аера да инде.

Булыр икән кешеләрнең Анадан туган көне. Җиңү көне — бу дөньяның Яңадан туган көне.

Шушы сүзләргә кушылып, безнең гимназиядә дә Җиңү көненә багышлап, төрле чаралар үткәрелде. Бер төркем укучылар Муса Җәлил һәйкәле янында Хәтер сагында тордылар.

Минһаҗева Айнур, 10а